Ong Hassan Thu |
 Click tamâ pak ni piéh pang
Web Champaka khaol dahlak likau salam nao ka abih ong kei mik wa adei sa-ai dam dara daok di ngaok dun-ya ni.
***
Mik wa adei sa-ai dam dara anit ranam,
Danak Sap Cam harei ni hu biai gruk saong wa Hassan Thu pieh ndom ka sakarai pajieng IOC (organization of IOC) daok pak nagar Amerika ni.
Wa Hassan Thu nan sa urang Cam daok pak palei Ram, tabiak di sala bac National Administration (Quốc Gia Hành Chánh) pak VN di thun 1967.
Dahlau di thun 1975, wa Hassan Thu ngap gruk di Phú Bổn Việt Nam hu apan janâng “vice governor” (Phó Tỉnh Trưởng). Hadei mang nan, wa Hassan Thu merai ngap gruk dalam Bộ Phát Triển Sắc Tộc.
Harei ni grusa mengawom wa Hassan Thu marai daok pak bal Orange County-LA, di nagar Amerika ni.
***
Web Champaka: Likau wa salam nao ka ong kei mik wa daok peng sep ndom web Champaka.
Hassan Thu: Dahlak ni angan Hassan Thu, meng dahlau nan Po Apan Akaok IOC. Ni dahlak likau salam nao ka abih ong kei mik wa adei sa-ai daok peng danak sap ndom Cam harei ni.
Web Champaka: Meng di thun 1981 tel harei ni, adei sa-ai Cam daok pak nagar Amerika hu padeng IOC, likau di wa brei ka mik wa thau ka gruk padak padeng IOC nan yau haber?
Hassan Thu: Mada meng di thun 1988, Po Dharma nan sa urang Cam hu bac da-a, salih mbaok ka Univesiti Parang pieh apan gruk roh duah bhap ilimo saong waris Campa di nagar Malaysia. Po Dharma yeh urang hu biai saong dua raja-an (chính phủ) Mayasia saong Parang njep deng tabiak ngap sa Harei Bhap Ilimo Campa (Ngày Văn Hóa Champa) mâk angan: Tamadun Melayu-Campa (Văn minh Melayu-Champa) di Kuala Lumpur di harei 12 saong 13 bulan 9 thun 1988 pieh brei ka dun-ya ni thau halei gok gha sakarai, bhap ilimo, saong adat ca-mbat Campa, sa baoh nagar siam metuaw daok di Viet Nam blaoh merai lahik jeh di thun 1832.
Pieh ngap gruk ni, jien padai huak mbeng, ndih daok jang yau ndik ahaok nao merai ka labaih 30 urang Campa merai meng Eropah saong Amerika nan hu raja-an Malaysia saong raja-an Parang deng kahria bayar abih.
Dalam 30 urang Campa hu nao Malaysia nan mboh hu hadom khoal likei min, tok hu sa urang kumei, nan nai Thieu, palei Ram pieh deng tabiak ngap muk Rija tamia. Danak ngap Tamadun Melayu-Campa di thun nan hu 3 nok hai lac jainh :
1). Bidang drap ar akhar tapuk sakarai, waris saong bhap ilimo Campa di Muyeum Nagar Malaysia pieh ka urang gleng aiek
2). Malam daoh tamia Campa krung Chế Linh saong Từ Công Phụng ba ngap
3). Harei pajum pataom pieh biai ka gruk sakarai saong waris Campa di Hotel Merlin (Concorde)
Malam daoh tamia Campa hu ngap tuei kadha Jawa Haok dalam Rija Praong, pieh lang yah ka akayet hai lac sakarai urang anạk patao Jawa-Melayu ndik gilai nao raweng Campa.
Malam daoh tamia Campa nan biak seh chai ralo-lo. Anâk Melayu hu ba gep merai aiek daok bak mblang kajang, nyu pah tangin mayaom ka nai Thieu ngap muk Rija biak gheh, cuk ao bhong meriah, mbaik khan putih tamia tadik biak makrâ, dalam tuk nan adei sa-ai aktik Campa bikan daoh pamre tuei ragem ginang saranai ngap ka thei jang duel di hatai. Hadei di malam daoh tamia nan nao, hadom harak ba-ar anakhan, TV saong Radio Melayu thei jang kieng ndom, kieng thau tel ka gruk sakarai saong waris Campa di nagar Malaysia. Nyu mâk gruk Campa merai chin biai dalam hadom balan, ngap ka angan Campa hu ndong wek di ngaok dun-ya ni.
Blaoh di harei Tamadun Melayu-Campa nan rei, abih hadom mik wa adei sa-ai Campa hu mbaok di nagar Malaysia hu pataom gep di hotel Merlin di harei 14 bulan 9 thun 1988 pieh biai ka gruk pajum pataom anâk Campa di grep dun-ya pieh kahri kahria ngap sa boah sang Campa saong gep mâk angan IOC-Campa.
Harei 14 bulan 9 thun 1988 nan jieng harei padeng nâm mâk IOC-Campa. Abih adei sa-ai hu mbaok dalam harei pajum nan thei jang that tiak sa kadha pok ong Hassan Thu jieng Po Apan Gruk pieh kahrii kahria harak ba-ar likau adat tabiak IOC di nagar Amerika di thun 1989.
Web Champaka: Likau di wa brei ka mik wa drei thau ka maksut (purpose) jalan gruk njep ngap saong gruk ngap amal (activities) IOC dalam 20 thun meng nan tel ni, mada hu hagait maneng? Gruk halei ka-ndah ka-ndaiy ken daman, gruk halei njuer njac hu brei haniim phuel ka IOC?
Hassan Thu: Tuei Adat (by-law) IOC hu 3 jalan gruk njep ngap:
1). Duei pataom abih anạk Campa di ngaok dun-ya tok thau ka gep wek;
2). Khik ramik pajum pataom bhap ilimo (Kultur) Campa;
3). Roh duah wek akhar tapuk, adat ca-mbat, sakarai, bhap ilimo Campa saong ba tabiak krung krâc bhap ilimo ni nao tel anâk tacaow Campa pieh ka hadom anâk Campa njep si thau wek ka asar gok gha Campa meng dahlau
Hadom gruk IOC ngap hu blaoh nan:
1). Hu tabiak mbaok IOC di bulan 8 thun 1990 saong hu ngap 2 harei semina Campa, yuen lac “Hội Thảo Campa” pieh biai ka krung krâc Melayu-Campa di Universiti Berkeley, Kaliphorni, Amerika.
Danak tabiak mbaok IOC hu dua nok, atau dua janih: a/ Semina chin biai ka gruk roh duah sakarai, waris saong bhap ilimo Melayu-Campa; b/ Malam daoh tamia Campa.
2). Thun 1992, hu ngap Harei Bhap Ilimo Campa di Universiti Sakramento State pieh tadhuw ayuh bulan Kate Campa
3). Thun 1993, ngap sa malam daoh tamia Campa pak Sakramento.
4). Thun 1994, hu ngap Harei Bhap Ilimo Campa di San Jose State Universiti pieh tadhuw ayuh bulan Kate Campa
5). Thun 1994, ngap sa malam daoh tamia Campa pak San Francisco
6). Thun 1998 peh harei pajum di San Jose pieh pilih ganuer urang baruw apan gruk IOC saong kahrii kahria ka jalan gruk baruw njep ngap nao meng anak, pilih Doktor Po Dharma jieng urang apan gruk duah jalan padeng tapuk Champaka pieh chin biai ka sakarai, akhar tapuk saong adat ca-mbat Campa.
Hadei di thun 1998, IOC padeh ngap Harei Bhap Ilimo Campa di bulan Kate pieh ba abih prân yawa nao ka gruk roh duah sakarai ngan bhap ilimo Campa saong ba tabiak hadom krung krâc sakarai, bhap ilimo Campa nao tel grep buel bhap Campa pieh harei hadei thau ka asar gok gha nagar Campa wek.
Thun 1999, IOC hu tabiak mbaok Champaka angka 1 di krung Westminster, Kaliphoni, Amerika. Champaka nan sa baoh tapuk ilimo krung urang hu bac da-a dalam dun-ya ni, yau khaol Parang, Malaysia, Campuchia, Japun saong adei sa-ai Champa pataom gep pieh roh duah wek hadom gok gha sakarai, bhap ilimo saong adat-cambat Campa. Harei tabiak tapuk Champaka angka di 1 nan biak yeh sa harei jaiyak, siam makrâ (success), kayua IOC nao njep jalan gruk ngap krung adat IOC hu ba tabaik. Dalipan thun tapa blaoh, meng di thun 1999 tel thun 2007, IOC hu tabiak mbaok tajuh baoh tapuk Champaka, pataom wek hu lalaih kurang 2000 hala bi-ar ndom biai meng gruk sakarai, bhap ilimo nao tel akhar tapuk, adat ca-mbat Campa krung khaol hu ilimo glaong di dun-ya wak tabiak caik wek ka buel bhap Campa di harei ni.
Web Champaka: Dalam thun balan pak anak ni, IOC hu jalan gruk ngap hagait siam makrâ pieh akhan saong mik wa Cham drei thau yaom.
Hassan Thu: IOC niat (intend) dalam hatai njep padeng sa danak gruk ngap baruw nan ba sap puec panuec ndem Cam tuei akhar rumi atau akhar latin pieh anâk Campa daok di ngaok dun-ya ni hu jalan dak daong saong gep, ndem puec saong gep hai lac biai gep tapa harak bi-ar, email internet drah jieng, samar jieng, kayua lac akhar thrah Cam pa-ndar dalam internet di hu o.
Gruk bhian pataom gep tapa jalan email saong internet ac ba anâk Campa drei merai njep gep wek, sa tung sa hatai saong gep wek, blaoh kaoh klak abih hadom gruk parabha, hanaoh ginaong lac kau ni Cam baruw, hâ ni Cam klak, kau ni Cam awal hâ ni Cam ahier ngap yau panuec pa-ndit krung akhar tapuk hu caik wek: Nagar Campa nan sa. Anâk Campa nan sa, sep puec panuec ndom Cam nan sa.
Harei 27-12-2008 pak anak ni, IOC hu ngap Harei Mbuen pieh auen ka Harei 20 thun IOC pajiak pajieng di Los, dalam harei nan rei, IOC hu tabiak mbaok 3 baoh tapuk Champaka baruw, nan Champaka angka 8, 9 saong 10. Likau mik wa adei sa-sai merai mbeng phuel mbeng yaom saong khaol dahlak hai.
Dahlak likau abih panuec. Tadhau salam.
***
Mik wa adei sa ai dam dara anit ranam,
Mik wa adei sa-ai halei hu hadom gruk hagait pieh akhan, pieh chin biai saong gep, likau di mik wa adei sa-ai payua harak nao ka Web Champaka:
178 Tamarack Drive
Corona, CA 92881
USA
Atau angan email: champaka@champaka.org
Danak Sap Ndom Cam merai meng Web Champaka di nagar Amerika likau padeh pak ni, paguen saong mik wa adei sa-ai dam dara peng wek danak Sap Cam dalam harei hadei si tel.
Likau kajep karo nao ka abih gep.
Salam
Web Champaka
|
Nhịp cầu Champa
